Aloqa, axborotlashtirish va telekommunikatsion texnologiyalar davlat qo‘mitasi qarori bilan jamoat foydalanish joylarida internet tarmog‘idan axborot olish imkonini berish tartibi to‘g‘risidagi Nizomga o‘zgartish va qo‘shimchalar kiritildi.

“Gazeta.uz”ning xabar berishicha, 31-mart kuni kuchga kirgan o‘zgarishlar internet-provayderlar — tijorat asosida internet tarmog‘iga ulanish xizmatini ko‘rsatuvchi yuridik shaxslarga tegishli bo‘ldi.

Nizomda jamoat foydalanish joylari uchun umumiy talablar kengaytirildi. Ularning ko‘p qavatli binolardagi yerto‘la yoki yarim yerto‘la qismlarda joylashishi qat’iy taqiqlandi.

Endi jamoat foydalanish joylarida zarur texnik vositalar (kompyuterlar, modem, telefon apparatlari va boshqalar)dan tashqari, tashrif buyuruvchilarning xavfsizligini ta’minlash maqsadida videokuzatuv kameralari ham o‘rnatilishi kerak.

Navro‘z bayrami kunlari Uchquduqdagi 40 nafar konchilar oilalariga yangi to‘rt qavatli turar joydagi xonadonlar kalitlari topshirildi. Bu haqda Navoiy viloyatining “Do‘stlik bayrog‘i” gazetasi xabar berdi.

Ushbu imorat “Shimol” qurilish-montaj boshqarmasi tomonidan qurildi. Boshqarma rahbari Toshtemir Azimovning sohadagi 40 yillik tajribasi hamda Safar Sobirov boshchiligidagi quruvchilarning mahorati bilan bitkazilgan turar joyda sifat bilan bog‘liq hech qanday kamchilik topilmadi, deyiladi xabarda.

Ayni paytda Uchquduqda yana bir 48 xonadonli uy Navoiy kon-metallurgiya kombinatining Shimoliy kon boshqarmasi ishchilari uchun qurilmoqda. Ushbu turar joy O‘zbekiston mustaqilligining 23 yilligi arafasida foydalanishga topshirilishi ko‘zda tutilgan.

Manba: www.daryo.uz